Жазғы кітапхана алаңы кітап оқуды және қызықты демалысты ұнататын балалардың басын қосты. Қатысушылар өз көңіл күйіне сай кітап таңдап, «Күлкім келеді», «Жаңа нәрсе білгім келеді», «Демалғым келеді», «Шабыт алғым келеді», «Ойланғым келеді» және «Романтика көңіл күйі» атты тақырыптық бөлімдер бойынша ұйымдастырылған ерекше кітап көрмесімен танысты.

Балалардың ерекше қызығушылығын «Көңіл күйіңді таңда» ойыны тудырды. Ойын барысында әр қатысушы тілек жазылған карточканы таңдап, соған сәйкес оқуға ұсынылатын кітаптармен танысты. Одан кейін балалар «Дәйексөз бойынша кітапты тап» атты танымдық викторинаға қатысып, сүйікті әдеби кейіпкерлері мен белгілі авторларды еске түсіріп, сұрақтарға жауап беріп, өз білімдері мен тапқырлықтарын көрсетті. Белсенді қатысушылар естелік кітап белгілерімен марапатталды.

Акцияның ерекше әсерлі сәттерінің бірі «Кітап болжамы» болды. Балалар сиқырлы сандықшадан ізгі тілектер мен әдеби нақылдар жазылған карточкаларды қызығушылықпен таңдап алып, өздеріне жаңа әсер, шабыт және көтеріңкі көңіл күй сыйлайтын кітаптармен танысты.

Іс-шара жылы әрі достық атмосферада өтті. Жас оқырмандар кітаптарды қызығушылықпен қарап, оқыған шығармалары туралы пікір алмасты және барлық ұсынылған тапсырмаларға белсенді қатысты. Акция балаларға кітаппен сырласудың қуанышын сыйлап, кітап оқудың қызықты, танымдық әрі әр адамның көңіл күйіне сай ерекше әсер сыйлай алатынын көрсетті.